QUEN CON LUME XOGA, QUÉIMASE

TÍTULO: Xa non estou aquí

AUTOR: Iria Misa

EDITORIAL: XERAIS. Colección: Fóra de xogo

Novela formativa con lección moral, ideal para mozos e mozas con inquedanzas.

Ópera prima, de considerable contido social, de Iria Misa Peralba (Gondomar, 1983), profesora de Ensino Secundario; galardoada co “Premio Jules Verne de Literatura Xuvenil 2016”.

Nela cóntasenos a desaparición de Ánxela, moza repetidora de 1º de Bacharelato, a súa busca desesperada e posterior encontro.

Ánxela  non está a vivir un bo momento, séntese doída pola ruptura coa súa parella, alonxada dos seus pais e irmán; desubicada, non atopa o seu lugar no mundo. Asiste ao Instituto de mala gana, “lata” sempre que pode e recala a miúdo na aula de castigo, onde coincide con María, que a seduce de inmediato polo seu aire rebelde, pola súa forma de estar e comportarse, pola autoridade que emana fronte aos compañeiros…  María forma parte dun grupo con aspecto gótico, diferente do resto, coñecido coma Os Murnios, catro mozos (Carlos, Leirós, Xan e Gabriel) e unha moza (María). Témeselles e respectáselles a partes iguais. Ánxela séntese engaiolada por eles. A través de María entra en contacto co grupo, tamén co mundo das drogas, encontrando deste xeito a visibilidade que tanto desexa. Dándolle, á súa vez, un xiro determinante a súa vida.

Os Murnios teñen unhas normas escritas polas que se rexen e cuxo obxectivo é a busca do pracer polo pracer sen ningunha consideración moral. Sométense a probas extremas buscando experiencias límite. De aí o título da recensión: “Quen con lume xoga, quéimase…”. Aínda que estas probas xeran dúbidas e angustia a nosa protagonista, o desexo de ser aceptada e valorada polo grupo, lévaa a querer demostrar a súa ousadía e valor por enriba de todo.

Ánxela, desde o comezo da narración fainos partícipes das súas coitas, medos e devezos. Cada capítulo está narrado por un personaxe diferente da súa contorna,  co que imos construíndo a historia da protagonista e a  súa desaparición (tamén do mundo que a rodea), desde distintos puntos de vista que se entrelazan e  nos desvelan pouco a pouco o que sucedeu.  A narración comeza o día no que Ánxela desaparece, meses despois do comezo de curso e a súa entrada nos Murnios.

Aínda que se intúe o final, a trama atrapa e mantén o interese en todo momento, con linguaxe áxil e precisa.

Dende a Biblioteca dámoslle as grazas a nosa compañeira SUSANA DEVESA 

pola revisión e mellora desta reseña.